12 t’April 2022
Il-Finali tal-BOV Tazza l-Kbira l-Ħadd 24 t’April
Aktar kmieni llum fl-uffiċini tal-Korsa tal-Marsa ttellgħu l-poloz taż-żwiemel finalisti li se jipparteċipaw fit-62 edizzjoni tal-BOV Tazza l-Kbira nhar il-Ħadd 24 t’April 2022. Bħas-soltu dan is-sorteġġ sar fil-preżenza tas-sidien stess li kienu qed jistennew b’antiċipazzjoni n-numri li jistgħu jiddeterminaw l-andament ta’ din il-finali meqjusa bħala l-aktar prestiġjuża fil-kalendarju tat-trott lokali.
Preżenti għal din il-polza kien hemm ukoll is-Sur Charles Azzopardi Executive CSR u Marketing tal-Bank of Valletta kif ukoll l-Avukat Matthew Brincat Kap Eżekuttiv ta’ Marsa Race Track Limited u s-Sur Anthony Demanuele rappreżentant tas-sidien u s-sewwieqa fi ħdan EquestriMalta.
“Qed nistennew bil-ħerqa finali oħra eċitanti tal-BOV Tazza l-Kbira” qal Charles Azzopardi. “Il-Bank huwa impenjat lejn is-saħħa u l-benesseri f’konformità mal-impenji ESG tiegħu u nieħdu din l-opportunità biex nawguraw lis-sidien taż-żwiemel, is-sewwieqa, it-trainers u dawk kollha involuti f’din it-tellieqa.”
L-istennija għal din il-finali hija waħda kbira hekk kif kemm mis-sitt heats li saru nhar il-31 ta’ Marzu kif ukoll iż-żewġ semi finali ta’ nhar il-Ħadd li għadda jidher ċar kemm il-kompetizzjoni hija waħda għolja. Grazzi ta’ dan imur għas-sidien li b’impenn qed jippreparaw iż-żwiemel tagħhom biex jagħtu l-ispettaklu mixtieq.
Fost it-tnax li waslu sal-finali għandna r-rebbieħ tas-sena l-oħra Antoine du Bourg li jidher li qiegħed fil-forma biex jiddefendi t-titlu hekk kif irnexxielu joħroġ rebbieħ kemm fil-heats kif ukoll fis-semi finali u bla dubju se jkun fost il-favoriti għar-rebħ ta’ din it-tiġrija. Minkejja dan però l-isfida mhux se tkun waħda faċli miż-żwiemel l-oħra. B’diversi elementi ġodda fosthom id-debba Infinite Knight li għalkemm ġejja mill-kategorija Gold hija wkoll rebħet il-heat u s-semi finali u se tkun qed taffronta lil Antoine du Bourg għall-ewwel darba. Għandna wkoll żewġt’iżwiemel li propju għamlu d-debutt tagħhom waqt dan il-Kampjonat u interessanti il-fatt li ħamsa mill-finalisti huma żwiemel li qabel il-heats kienu qed jiġru fi klassi Gold.
Il-medja rekord tal-finali tibqa’ dik ta’ Up And Go 1’14”5 li wettaq fis-sena 2019 però l-aktar medja veloċi tal-kampjonat hija dik ta’ 1’13”7 irreġistrata fis-semi finali tas-sena 2020 minn Vivaldi du Vivrot li eventwalment rebaħ l-edizzjoni ta’ dik is-sena.
Din is-sena l-finalisti ser jitilqu b’dawn in-numri:
1. BAMBINO DES FLOTS (Noel Baldacchino)
2. BARA MIN (Clint Vassallo)
3. INFINITE KNIGHT (Charles Camilleri)
4. ANTOINE DU BOURG (Redent Magro)
5. DYNAMIT LIFE (Kerstin Galea)
6. DOUDOU DE BOUERE (Jean Claude Pace)
7. ANDANTE (Cherise Farrugia)
8. CAVIAR DU VIVIER (Rodney Gatt)
9. DUNBAR (Cliferty Calleja)
10.CHARMING SOLDIER (Paul Galea)
11.GIGANT WELL (Charles Degiorgio)
12.UNSTOPPABLE (Carl Caruana)
Lorraine Cunningham
Public Relations & Media Coordinator
Malta Racing Club
MRC/05/22
